Elmira Asanova
Quyumcılıq
1964 senesi dünyağa keldi. Qırımda, Bağçasaray şeherinde yaşay.
Qırımtatar milliy örnekleriniñ aksi olğan qırımtatar telkari işçiligi qatmer, yani qat-qat olma, bağlarnıñ tüzgün ve parçalarnıñ şeffaf olma hususiyetine malik. Bu esas hususiyetlerni mahirane ilvanlarda ustalıqnen akis etken quyumcı-hanım Elmira Asanova telkari işçiligini yüksek derecede menimsedi. Bilgilerini babasından, adı belli olğan usta-başı Ayder Asanovdan aldı. Bugün Elmira-usta Bağçasarayda quyumcılar sülâlesiniñ işini devam etmekte.
Ecdatlardan qalğan qırımtatar ilvanlarını muzey ya da şahsiy kollektsiyalardan tapıp ögrene ve ustalığını yükselte. O eski qırımtatar ilvanlarınıñ professional restavratsiya işlerini becergen yekâne ustası ola.
Milliy ilvanlardan ğayrı, qırımtatar menligini akis etken unsurlardan faydalanıp, zemaneviy şekilli küpe, bilezik, gerdanlıq ve yüzüklerni işlep çıqara.
Elmira-usta «Miras» adlı telkari ustahanesiniñ esasçılarından biri ola
Yipişli quşaq. Milliy qız bala quşağı. Şahsiy kollektsiyada bulunğan ananeviy quşaqnıñ kopiyası. Melhior, kümüş ve altın qaplanması, cam. Qırımtatar telkari işçiligi.
Yipişli quşaq. Milliy qadın-qızlar quşağı. Muzey kollektsiyasında bulunğan ananeviy quşaqnıñ kopiyası. Melhior, kümüş ve altın qaplanması. Qırımtatar telkari işçiligi.
Bilezikler. Şahsiy kollektsiyalarda bulunğan eki çeşit bileziklerniñ kopiyaları. Melhior, kümüş qaplanması. Qırımtatar telkari işçiligi.
Bilezik. Elmira Asanovanıñ donatımı. Kümüş. Qırımtatar telkari işçiligi.
Fes töpeligi. Muzey kollektsiyasında bulunğan ananeviy fes töpeliginiñ kopiyası. Melhior, kümüş ve altın qaplanması. Qırımtatar telkari işçiligi.
Fes töpeligi. Şahsiy kollektsiyada bulunğan ananeviy fes töpeliginiñ kopiyası. Kümüş, yaldız. Qırımtatar telkari işçiligi.
Süs taqımı (bileziknen boyun süsü). Elmira Asanovanıñ donatımı. Kümüş, lazurit. Qırımtatar telkari işçiligi.