Mamut Çurlu

Sır qaplama işçiligi (mayolika), nağış, kilim toqumacılığı, bediiy boyalama, resim

1946 senesi dünyağa keldi. Qırımda, Aqmescit rayonı Anğara köyünde yaşay.

Mamut-usta zemaneviy qırımtatar dekorativ sanatınıñ tarihinde peyda olğan unikal bir simadır. O künümizdeki qırımtatar ustalarınıñ çoğuna qırımtatar örnekleri boyunca ocalıq etken insan ola. Ustanıñ çizimleri ve eskizleri boyunca sır qaplama tehnikasında süs tabaqları yapılmaqta. O qurğan kompozitsion şablonları temelinde toqumacı hanım-ustalar renkli kilimler toqumaqtalar.

Mamut Çurlu qırımtatar milliy kilim toqumacılığını ğayrıdan teklemek içün bu mevzuğa bağışlanğan leyha azırlap kerçekleştirdi. Qırımtatar milliy kilimi haqqında bilgiler toplamaq içün ekspeditsiyalar tizdi. Yün yipiniñ saf (tabiiy) boyalarnen boyalama tehnologiyasını ğayrıdan tikledi.

Usta Ukraina ve çetel memeleketlerniñ muzeylerinde bulunğan qırımtatar nağış kollektsiyalarınıñ tedqiqatçısı ola. O qırımtatar örnegine bağışlanğan maqaleleriniñ muellifidir.

Qırımtatar ananeviy örnegi esasında ve orta asiyanıñ süzanni nağışında qullanılğan bazı tikişlerni birleştirip büyük ebatlı dekorativ pannolarnı meydanğa ketirgen ve bu yönelişke yol açqan ilk insan ola.

Mamut-usta Çurlu «Çatır Dağ» icadiy birleşmesiniñ tesisçisidir. O qırımtatar dekorativ el sanatınıñ ğayrıdan tiklenüvinen oğraşqan «Qırım tarzı» adlı leyhanıñ muellifi ve rehberi ola